ऑनलाईन गेमिंगच्या नावाखाली फसवणूक! महाराष्ट्र सायबरचा गेमर्सना सतर्कतेचा इशारा
ऑनलाईन गेमिंगची वाढती लोकप्रियता पाहता सायबर गुन्हेगारांनी गेमर्सना लक्ष्य करण्यास सुरुवात केली आहे. मोफत डायमंड्स, स्किन्स, यूसी (UC) किंवा इतर आकर्षक इन-गेम रिवॉर्ड्सचे आमिष दाखवून फसवणूक केली जात आहे. याच पार्श्वभूमीवर महाराष्ट्र सायबरने जनजागृती मोहीम राबवत नागरिकांना सावध राहण्याचे आवाहन केले आहे. अनोळखी लिंकवर क्लिक करणे, वैयक्तिक माहिती शेअर करणे किंवा संशयास्पद वेबसाइटवर लॉगिन करणे टाळावे, असे आवाहन करण्यात आले आहे.
गेमर्सना कसे बनवले जाते लक्ष्य?
सायबर फसवणूक करणारे मोफत डायमंड्स, स्किन्स किंवा प्रीमियम गेमिंग रिवॉर्ड्सचे आमिष दाखवतात. त्यानंतर बनावट वेबसाइट किंवा संशयास्पद लिंकवर क्लिक करण्यास भाग पाडले जाते. तेथे लॉगिन आयडी, पासवर्ड, ओटीपी किंवा बँकिंग माहिती मागवून गेमिंग खाते आणि आर्थिक माहिती चोरली जाते.
फसवणुकीचे सामान्य प्रकार
- मोफत डायमंड्स किंवा गेमिंग रिवॉर्ड्सचे खोटे आमिष.
- बनावट गेमिंग वेबसाइट आणि फिशिंग लिंक्स.
- लॉगिन आयडी, पासवर्ड आणि ओटीपीची मागणी.
- वैयक्तिक आणि बँकिंग माहितीची चोरी.
- गेमिंग खाते हॅक करून आर्थिक फसवणूक.
सुरक्षित गेमिंगसाठी महाराष्ट्र सायबरचा सल्ला
- कोणतीही ऑफर स्वीकारण्यापूर्वी तिची खातरजमा करा.
- पासवर्ड, ओटीपी किंवा लॉगिन माहिती कोणालाही देऊ नका.
- अनोळखी किंवा संशयास्पद वेबसाइटवर क्लिक करणे टाळा.
- संशयास्पद लिंक, अकाउंट किंवा वेबसाइटची तात्काळ तक्रार करा.
- अल्पवयीन मुलांनी पालकांच्या मार्गदर्शनाखाली गेमिंग करावे.
- आर्थिक फसवणूक झाल्यास त्वरित 1930 हेल्पलाइनवर संपर्क साधा किंवा www.cybercrime.gov.in वर तक्रार नोंदवा.
‘क्लिक’ करण्यापूर्वी विचार करा
सायबर गुन्हेगार गेमर्सच्या उत्साहाचा फायदा घेत आकर्षक ऑफर्सच्या माध्यमातून फसवणूक करतात. त्यामुळे कोणत्याही ऑफरवर विश्वास ठेवण्यापूर्वी तिची पडताळणी करणे आणि सुरक्षिततेचे नियम पाळणे हीच सायबर फसवणुकीपासून बचावाची प्रभावी उपाययोजना आहे.
