मुंबई: मुंबईत इमारतींपेक्षा झोपडपट्टी परिसरात अँटीबॉडीजचे प्रमाण अधिक असल्याचे नुकत्याच हाती घेण्यात आलेल्या सेरो सर्वेक्षणातून समोर आले आहे. या सर्वेक्षण अहवालात रक्त नमुने घेऊन केलेल्या सर्वेक्षणात पहिल्या सर्वेक्षणाप्रमाणेच निष्कर्ष मांडला आहे.
‘करोना संसर्ग लक्षात घेऊन रक्त नमुने घेऊन केलेल्या सर्वेक्षण उपक्रम नीती आयोग, मुंबई पालिका, टाटा इन्स्टिट्यूट ऑफ फंडामेंटल रिसर्च यांच्यामार्फत संयुक्तरित्या राबवला जात आहे. या सर्वेक्षणात अभ्यास करताना कस्तुरबा रेणू जीवशास्त्र वैद्यकीय प्रयोगशाळा, ट्रान्सलेशनल स्वास्थ्य विज्ञान आणि प्रौद्योगिकी संस्थान, ए.टी.ई. चंद्रा फाऊंडेशन आणि आय.डी.एफ.सी. इन्स्टिट्यूट यादेखील सहयोगी संस्था म्हणून सहभागी आहेत.
सेरो सर्वेक्षणात रक्तातील अँटीबॉडीज प्राबल्य जाणून घेतले जाते. त्यासाठी नमुने संकलित केले गेले. त्यात सर्वसाधारण लोकसंख्येचे वय, लिंग यातील स्तरानुसार, आणि आरोग्य कर्मचाऱ्यांचे यांचे नमुने गोळा केले जातात. त्याआधारे, साथ आजाराचा फैलाव कसा झाला, त्याचा अभ्यास करण्यासाठी दोन फेऱ्यांद्वारे सर्वेक्षण करण्याचे निश्चित केले होते. त्या सर्वेक्षणाची पहिली फेरी जुलै महिन्याच्या अखेरीस घेतली गेली. त्यानंतर दुसऱ्या फेरीतील सर्वेक्षणही पूर्ण झाले आहे. त्यात झोपडपट्टी परिसरातील नमुन्यात आढळून आलेले अँटीबॉडीजचे प्राबल्य आणि बाधित रुग्णांची संख्या ही झोपडपट्टी परिसरातील संसर्गात काही प्रमाणात घट झाल्याचे समोर आले आहे.
पहिल्या फेरीत ८,८७० पैकी एकूण ६,९३६ नमुने संकलित करण्यात आले होते. झोपडपट्टी आणि बिगर झोपडपट्टी परिसर मिळून आर/उत्तर, एम/पश्चिम आणि एफ/उत्तर या ३ विभागांमध्ये सर्वसाधारण लोकसंख्येतून हे नमुने संकलित केले गेले. त्यात अबॉट कंपनीच्या क्लिया पद्धतीचा उपयोग करून अँटी सार्स कोविड आयजीजी अँटीबॉडीजची पडताळणी झाली.
सर्वेक्षणाच्या दुसऱ्या फेरी अंतर्गत आर/उत्तर, एम/पश्चिम आणि एफ/उत्तर याच तीन विभागात हा सर्वे सप्टेंबर अखेरीस करण्यात आला. या फेरीत ५,३८४ नमुने संकलित केले. हे नमुने संकलित करण्यासाठी ७२८ जणांचा सहभाग होता. या फेरीतील सर्वेक्षणामध्ये लक्षणे असलेल्या, बरे झालेल्या किंवा लक्षणे नसलेल्या व्यक्तींचा समावेश होता. तसेच संस्थात्माक विलगीकरणात असलेल्या आणि सक्रीय प्रतिबंधात्मक क्षेत्रातील व्यक्तींना या अभ्यासातून वगळण्यात आले. एकूण नमुन्यांपैकी साधारणपणे एक ते दोन टक्के नमुने हे गेल्या फेरीत सहभागी झालेल्या व्यक्तीचेही होते.
दुसऱ्या फेरीतील सर्वेक्षणात संबंधित तीन विभागांत सर्वेक्षण झाले. त्यानुसार, झोपडपट्टी भागांमध्ये सरासरी सुमारे ४५ टक्के व बिगर झोपडपट्टी भागांमध्ये सुमारे १८ टक्के याप्रमाणे रक्तातील अँटीबॉडीजचे प्राबल्य आढळून आले आहे. अँटीबॉडीजचे प्राबल्य हे पुरुषांच्या तुलनेत महिलांमध्ये थोडेसे अधिक आढळले आहे. मात्र, पहिल्या फेरी दरम्यान तीनही विभागांतील लोकसंख्येमध्ये सर्व वयोगटांमध्ये समान प्राबल्य असल्याचे आढळले होते. तर दुसऱ्या फेरी दरम्यान हे प्राबल्य ४०पेक्षा अधिक वयोगटातील व्यक्तींमध्ये काही प्रमाणात अधिक असल्याचे आढळले आहे. यामध्ये हेल्थ पोस्ट, दवाखाने, आरोग्य कर्मचारी यांचा समावेश आहे.
