भारताविरुद्धच्या पहिल्या कसोटी सामन्यात इंग्लंडचा कर्णधार जो रुटने द्विशतक झळकावले. त्यानंतर इंग्लंडचा एक माजी कर्णधार आपल्या संघाची बाजू घेत होता. याबाबतचे त्याने ट्विट केल्यावर भारतीय त्याच्यावर तुटून पडल्याचे पाहायला मिळाले.
चेन्नई, IND vs ENG : इंग्लंडचा कर्णधार जो रुटने द्विशतक झळकावले. त्यानंतर इंग्लंडचा माजी कर्णधार मायकल वॉन हा आपल्या संघाची बाजू घ्यायला लागला होता. पण त्यानंतर वॉन आणि भारतीय चाहत्यांमध्ये चांगलेच ट्विटरवर युद्ध रंगल्याचे पाहायला मिळाले.
भारत आणि इंग्लंड यांच्यातील कसोटी मालिका सुरु होण्यापूर्वी वॉनने एक भाकित केले होते. या मालिकेबाबत वॉनने म्हटले होते की, ही मालिका भारतीय संघ सहजपणे जिंकले. या मालिकेत भारतीय संघ इंग्लंडचा ३-० असा पराभव करेल. पण रुटने द्विशतक लगावल्यावर मात्र वॉनने आपला सूर बदलल्याचे पाहायला मिळाले.
रुटच्या द्विशतकानंतर वॉन म्हणाला की, ” भारत आणि इंग्लंड यांच्यातील मालिकेबाबत केलेले भाकित मी बदलावे, असे मला वाटत आहे. कारण आता जडेजा भारताच्या संघात नाही, याचा चांगलाच फायदा इंग्लंडला होऊ शकतो. त्याचबरोबर इंग्लंडचा संघ आता दर्जेदार क्रिकेट खेळत असल्याचेही पाहायला मिळत आहे. त्यामुळे मी केलेले भाकित बदलावे का, असा विचार मी करत आहे.”
वॉनच्या या ट्विटनंतर भारतीय चाहत्यांनी वॉनला चांगलेच सुनावले आहे. भारतीय चाहत्यांनी यावेळी म्हटले आहे की, ” भारतीय संघाची अजून फलंदाजी आलेली नाही. त्याचबरोबर रोहित शर्मा या सामन्यात त्रिशतकही लगावू शकतो. त्यामुळे अजून बराच पिक्चर बाकी आहे…”
रुटने चेन्नईत शतक करण्याआधी श्रीलंकेविरुद्धच्या कसोटी मालिकेत त्याने पहिल्या कसोटीच्या पहिल्या डावात २२८ तर दुसऱ्या कसोटीत १८६ धावा केल्या होत्या. पहिल्या दिवशी रूटने शतक झळकावले. रुटचे ही १००वी कसोटी आहे. १००व्या कसोटीत शतक करणारा तो नववा खेळाडू ठरला. त्याच बरोबर ९८, ९९ आणि १००व्या कसोटीत शतक करणारा जो रूट हा जगातील पहिला क्रिकेटपटू ठरला होता. रुट आपला शंभरावा कसोटी सामना खेळत आहे. या शंभराव्या कसोटी सामन्यात सर्वाधिक धावा करण्याचा विश्वविक्रम रुटने रचला आहे. यापूर्वी हा विक्रम पाकिस्तानचा फलंदाज इंझमाम उल हकच्या नावावर होता. इंझमामने आपल्या शंभराव्या कसोटी सामन्यात १८४ धावा केल्या होत्या. पण रुटने आपल्या शंभराव्या कसोटीत द्विशतक झळकावले आणि इंझमामचा हा विश्वविक्रम मोडीत काढला आहे.
