बनारसी किंवा सिल्क साडीवर डाग पडला? ड्राय क्लिनिंगशिवाय घरच्याघरी अशी करा स्वच्छ

लग्नसमारंभ, सण-उत्सव किंवा खास कार्यक्रम म्हटले की महिलांची पहिली पसंती बनारसी आणि सिल्क साडी असते. या साड्या केवळ आकर्षक दिसत नाहीत, तर त्यांची किंमतही जास्त असल्यामुळे त्या जपून वापरल्या जातात. मात्र, अशा वेळी साडीवर चहा, कॉफी, तेल किंवा पनीरच्या ग्रेव्हीसारखे डाग पडले तर संपूर्ण मूड खराब होतो. अशावेळी बहुतांश जणी थेट ड्राय क्लिनिंगचा पर्याय निवडतात. पण काही सोप्या घरगुती उपायांच्या मदतीने हे डाग घरीच कमी करता येऊ शकतात.

माइल्ड शॅम्पूचा वापर
सिल्कचे कापड अतिशय नाजूक असते. त्यामुळे त्यावर कधीही सामान्य डिटर्जंट किंवा कडक साबण वापरू नये. यामुळे साडीचा रंग फिका पडू शकतो. कापड कमकुवत होण्याची शक्यता असते. त्याऐवजी बेबी शॅम्पू किंवा कोणताही माइल्ड शॅम्पू वापरावा. यामुळे साडी स्वच्छ राहते आणि तिची गुणवत्ता टिकून राहते.

तेलकट डागांसाठी कॉर्नस्टार्च
साडीवर भाजी, तूप, बटर किंवा तेलाचे डाग पडल्यास घाबरण्याचे कारण नाही. अशा वेळी डाग पडलेल्या भागावर त्वरित कॉर्नस्टार्च किंवा टॅल्कम पावडर शिंपडा. काही मिनिटे तसेच ठेवून नंतर मऊ कापडाने हलक्या हाताने पावडर काढून टाका. कॉर्नस्टार्च तेल शोषून घेतो, त्यामुळे डाग बऱ्याच प्रमाणात कमी होण्यास मदत होते.

चहा किंवा कॉफीचे डाग काढण्यासाठी व्हाइट व्हिनेगर
साडीवर चहा, कॉफी किंवा ज्यूसचे डाग पडल्यास व्हाइट व्हिनेगर उपयुक्त ठरू शकतो. एका कप पाण्यात एक चमचा व्हाइट व्हिनेगर मिसळा. त्यानंतर स्वच्छ सूती कापडाच्या मदतीने हे मिश्रण डागावर हलक्या हाताने लावा. हा उपाय डाग कमी करण्यास मदत करतो आणि सिल्क साडीची नैसर्गिक चमकही टिकवून ठेवतो.

सिल्क साडी धुताना आणि सुकवताना या चुका टाळा
सिल्क साडी धुताना ती कधीही जोरात घासू नये. असे केल्यास नाजूक धागे तुटू शकतात आणि साडीचा आकारही बिघडू शकतो. अतिरिक्त पाणी काढण्यासाठी साडी हलक्या हाताने दाबावी. तसेच सिल्क किंवा बनारसी साडी कधीही कडक उन्हात वाळवू नये. थेट सूर्यप्रकाशामुळे साडीचा रंग फिका पडू शकतो आणि झरीवरील काम काळवंडण्याची शक्यता असते. त्यामुळे साडी नेहमी घरात किंवा सावलीच्या, हवेशीर ठिकाणी वाळवणे अधिक योग्य ठरते.