नागपुरात दुचाकीस्वारांच्या सुरक्षेशी संबंधित मोठी कारवाई करण्यात आली आहे. भारतीय मानक ब्युरो (BIS) ने आयएसआय (ISI) चिन्ह नसलेल्या हेल्मेटच्या विक्रीविरोधात धडक शोध आणि जप्ती मोहीम राबवत एका हेल्मेट विक्री केंद्रावर छापा टाकला. या कारवाईत 38 हेल्मेट जप्त करण्यात आली असून संबंधित दुकानाविरोधात भारतीय मानक ब्युरो अधिनियम, 2016 अंतर्गत पुढील कायदेशीर कारवाई सुरू करण्यात आली आहे.
तक्रारीनंतर BIS ची छापेमारी
मिळालेल्या तक्रारीच्या आधारे भारतीय मानक ब्युरोच्या अधिकाऱ्यांनी 15 जुलै 2026 रोजी नागपुरातील कपिल नगर, नारी रिंग रोड येथील कल्पना कॉम्प्लेक्समधील डीजे हेल्मेट शॉप येथे शोधमोहीम राबवली. तपासणीदरम्यान दुकानात अनिवार्य आयएसआय चिन्ह नसलेली दुचाकी हेल्मेट विक्रीसाठी ठेवण्यात आल्याचे आढळून आले.
🔴 @IndianStandards कडून नागपुरात आयएसआय चिन्ह नसलेल्या हेल्मेटच्या विक्रीविरोधात शोध आणि जप्तीची कारवाई
भारतीय मानक ब्युरो अधिनियम, 2016 मधील तरतुदींनुसार संबंधित दुकानाविरुद्ध पुढील कायदेशीर कारवाई सुरू करण्यात आली आहे.
📙https://t.co/jKTAzY0CmH pic.twitter.com/9DuRwy40jy— PIB in Maharashtra 🇮🇳 (@PIBMumbai) July 16, 2026
38 हेल्मेट जप्त
कारवाईदरम्यान अधिकाऱ्यांनी एकूण 38 हेल्मेट जप्त केली. यामध्ये ‘रिषभ’ ब्रँडची 27, ‘एमएएस’ ब्रँडची 9 तसेच ‘स्टॉर्म’ आणि ‘ओशन’ ब्रँडची प्रत्येकी एक हेल्मेट आढळून आली. ही सर्व हेल्मेट आवश्यक BIS प्रमाणनाशिवाय विक्रीसाठी ठेवण्यात आल्याचा आरोप आहे.
कायद्यानुसार कारवाई
दुचाकी हेल्मेट (गुणवत्ता नियंत्रण) आदेश, 2020 नुसार हेल्मेटवर BIS चे प्रमाणन आणि ISI चिन्ह असणे बंधनकारक आहे. या नियमांचे उल्लंघन केल्याप्रकरणी भारतीय मानक ब्युरो अधिनियम, 2016 मधील कलम 17(1) आणि 17(3) अंतर्गत कारवाई करण्यात आली. जप्त हेल्मेट पुढील तपासासाठी पुरावा म्हणून ताब्यात घेण्यात आली आहेत.
ग्राहकांना BIS चे आवाहन
ग्राहकांच्या सुरक्षेला प्राधान्य देत BIS ने नागरिकांना हेल्मेट किंवा इतर अनिवार्य प्रमाणन असलेली उत्पादने खरेदी करण्यापूर्वी त्यावरील BIS परवाना आणि ISI चिन्हाची खातरजमा करण्याचे आवाहन केले आहे. यासाठी ग्राहकांनी BIS Care App किंवा अधिकृत संकेतस्थळाचा वापर करावा, असेही सांगण्यात आले आहे.
