मुंबईत बेस्ट बसच्या अपघातांची मालिका सुरूच असल्याचे चित्र आहे. दादरमधील अपघातानंतर आता भांडुप परिसरात बेस्टच्या ई-बसने भीषण अपघात घडवला. कोकण नगर येथील क्रिटिकल रुग्णालयाजवळ भरधाव बस अचानक अनियंत्रित होऊन एका पादचाऱ्यासह रस्त्यावरील अनेक वाहनांना धडकली. या दुर्घटनेत 63 वर्षीय पादचारी गंभीर जखमी झाला असून तीन दुचाकी आणि एका रिक्षेचे मोठे नुकसान झाले आहे.
चालकाचे नियंत्रण सुटल्याचा प्राथमिक अंदाज
प्राथमिक माहितीनुसार, बसवरील चालकाचे नियंत्रण सुटल्याने हा अपघात घडल्याची शक्यता व्यक्त करण्यात येत आहे. भरधाव बसने रस्ता ओलांडणाऱ्या पादचाऱ्याला जोरदार धडक दिल्यानंतर पुढे उभ्या असलेल्या वाहनांनाही धडक दिली. या घटनेमुळे परिसरात काही काळ भीतीचे वातावरण निर्माण झाले.
जखमीवर रुग्णालयात उपचार सुरू
अपघातानंतर स्थानिक नागरिकांनी तात्काळ मदतीसाठी धाव घेत जखमी पादचाऱ्याला जवळील रुग्णालयात दाखल केले. अतुल पडाळे (वय 63) असे जखमीचे नाव असून त्यांच्यावर उपचार सुरू आहेत. डॉक्टरांनी त्यांची प्रकृती चिंताजनक असल्याचे सांगितले आहे.
तीन दुचाकी आणि रिक्षाचे मोठे नुकसान
या अपघातात तीन दुचाकी आणि एका रिक्षाचे मोठे नुकसान झाले. बसच्या धडकेमुळे काही काळ वाहतूक विस्कळीत झाली होती. पोलिसांनी घटनास्थळी पोहोचून वाहतूक सुरळीत करण्यासाठी उपाययोजना केल्या.
अपघाताचे कारण शोधण्यासाठी तपास सुरू
घटनेची माहिती मिळताच स्थानिक पोलीस आणि बेस्ट प्रशासनाचे अधिकारी घटनास्थळी दाखल झाले. बसमध्ये तांत्रिक बिघाड झाला होता की चालकाचे नियंत्रण सुटल्यामुळे अपघात झाला, याचा तपास सुरू आहे. अपघातास कारणीभूत असलेल्या सर्व बाबींची चौकशी करून पुढील कारवाई केली जाणार असल्याचे अधिकाऱ्यांनी सांगितले.
दादरनंतर पुन्हा बेस्ट बसच्या सुरक्षिततेवर प्रश्नचिन्ह
काही दिवसांपूर्वी दादरमध्ये झालेल्या भीषण बेस्ट बस अपघातानंतर हा दुसरा गंभीर अपघात घडल्याने बेस्टच्या ई-बसच्या सुरक्षिततेबाबत पुन्हा प्रश्न उपस्थित होत आहेत. मात्र, या अपघातामागील नेमके कारण तपास अहवालानंतरच स्पष्ट होणार आहे.
