मुंबई: करोना रुग्णांच्या संख्येत झपाट्यानं घट होत असली तरी पूर्ण वेळ मुंबई लोकल ट्रेन सेवेसाठी मुंबईकरांना आणखी काही दिवस वाट पाहावी लागणार आहे. मात्र, चाकरमान्यांची प्रवासाची अडचण लक्षात घेऊन काही प्रमाणात दिलासा देण्याचा राज्य सरकारचा विचार सुरू आहे. त्यानुसार, कमी गर्दीच्या वेळेस म्हणजे, सकाळी ७ च्या आधी आणि रात्री १० नंतर लोकल ट्रेन सर्वांसाठी सुरू होण्याची शक्यता आहे.
राज्यात अनलॉक सुरू झाल्यापासून मुंबई लोकल सेवा सुरू करण्याची मागणी सातत्यानं होत आहे. मात्र, राज्य सरकार अत्यंत सावधपणे पावले टाकत असल्यानं अद्याप पूर्ण क्षमतेनं सर्वांसाठी लोकल सेवा सुरू करण्यात आलेली नाही. या संदर्भात सतत नवनव्या तारखा दिल्या जात आहे. सुरुवातील डिसेंबरच्या मध्यात लोकल सुरू करण्याचे संकेत देण्यात आले होते. मात्र, तो मुहूर्त टळला. त्यानंतर नव्या वर्षात करोना रुग्णांची संख्या पाहून निर्णय घेतला जाईल, असं सांगण्यात आलं होतं. मात्र, आता वेगळीच माहिती पुढं येत आहे. लोकल सेवा सर्वांसाठी सुरू करण्याचा विचार सुरू आहे. मात्र, ती पूर्ण वेळ नसेल, अशी माहिती पुढं येत आहे. त्याऐवजी कमीत कमी गर्दी असलेल्या वेळेत ट्रेन सुरू करण्याच्या प्रस्तावावर विचार सुरू आहे.
सध्या अत्यावश्यक सेवेतील कर्मचाऱ्यांसह राज्य सरकारनं वेळोवेळी परवानगी दिलेल्या कर्मचाऱ्यांनाच लोकल प्रवासाची मुभा आहे. महिलांनाही प्रवासाची मुभा असला तरी त्यासाठी ठराविक वेळा देण्यात आल्या आहेत. सध्या पश्चिम रेल्वे मार्गावर १३६७ तर, मध्य रेल्वे मार्गावर १७७४ फेऱ्या चालवल्या जात आहेत.
या संदर्भात बोलताना रेल्वेचा अधिकारी म्हणाला, ‘लोकल सर्वांसाठी सुरू करण्याचा निर्णय घेण्याच्या दृष्टीनं या आठवड्यात आढावा घेण्यात येणार आहे. मात्र, या निर्णयाला काही वेळ लागेल. स्थानकावरील गर्दीच्या व्यवस्थापनाची व्यवस्था आपल्याकडं नसणं ही ‘सोशल डिस्टन्सिंग’ राखण्याच्या दृष्टीनं मोठी अडचण आहे.’
