आज दुपारी साडेतीनच्या सुमारास मुंबई-पुणे रेल्वेमार्गावर दरड कोसळल्याची घटना घडली. पावसामुळे खंडाळा (बोरघाट) घाटात मंकिहिल जवळ मिडल आणि डाऊन लोहमार्गावर दरड कोसळली तर खंडाळ्यातील महिला पोलीस प्रशिक्षण केंद्रासमोर रेल्वे साठे मिसळ मागे लोहमार्गावर लगतची संरक्षक भिंत कोसळली. यामुळे मुंबई – पुणे मध्य रेल्वेची वाहतूक विस्कळीत झाली. रेल्वेच्या वतीने मार्गावरील दरड हटविण्याचे काम युद्धपातळीवर सुरू असून या घटनेमुळे पुण्याकडे येणारी रेल्वे सेवा विस्कळीत झाली आहे. मंकिहिल ते कर्जत दरम्यान लोहमार्गावर दरड कोसळण्याची ही १५ दिवसातील चौथी घटना आहे.
